TIRANE- Në 29 mars, Prokuroria e Krimeve të Rënda pritet të japë pretencën për 9 të pandehurit në gjyqin e “xhihadisteve”.
Në seancën e kësaj të marte janë verifikuar hyrje – daljet në pikat e kalimit kufitar të dy prej të pandehurve Gerti Pashja dhe Edmond Balla.
Nga ana e të dyja palëve, si ajo e prokurorisë ashtu dhe pala mbrojtëse, ka mbaruar tashmë marrja në pyetje e dëshmitarëve si dhe shqyrtimi i të gjitha provave të mbledhura për këtë çështje gjyqësore.
Në fund të këtij muaji pritet që organi i akuzës të shprehet për dënimet ndaj 9 të pandehurve të akuzuar për rekrutimet e shtetasve shqiptarë që janë dërguar për të luftuar në Siri.
I pandehur Gerti Pashja deklaroi në seancën se akuzat e ngritura ndaj grupit të tyre janë luftë ndaj myslimanëve.
9 të pandehurit në këtë proces Genci Balla, Bujar Hysa, Gert Pashja, Fadil Muslimani, Orion Reci, Edmond Balla, Astrit Tola, Verdi Morava dhe Zeqir Imeri, akuzohen për rekrutim të personave për kryerje të veprave terroriste, financim terrorizmi si dhe nxitje, thirrje publike dhe propagandë për kryerjen e veprave me qëllime terroriste. /Tv Klan
