Në orën 20:00 janë mbyllur qendrat e votimit në Spanjë, teksa kanë dalë edhe rezultatet e para të exit-poll. Siç edhe pritej, në këto zgjedhje forcë e parë janë konfirmuar socialistët e Pedro Sanchez, të ndjekur nga Partia Popullore e Pablo Casado. Megjithatë, socialistët e PSOE nuk arrijnë të formojnë mazhorancën, duke pasur nevojë për koalicion.
Exit-poll e “Gad3” e projektojnë Partinë Socialiste me 28,1%, mes 116 dhe 121 mandate dhe Unidos Podemos me 14,1%, që projektohet të marrë mes 42 dhe 45 mandate. Në total, fronti i majtë shihet mes 158 dhe 166 deputetë, nga 176 që duhen për të formuar mazhorancën.
Nga fronti i djathtë, Partia Popullore me 17,8% parashikohet të marrë 69-73 mandate, Ciudadanos 16,1% me 48-49 mandate dhe populistët e Vox me 36-38 mandate. Edhe nëse këto parti të djathta bashkohen, nuk do të kenë më shumë se 160 mandate.
Përtej parashikimeve për qeverinë e ardhshme, i rëndësishëm është fakti se partia e ekstremit të djathtë Vox, ka arritur të fitojë 12,1% të votave duke u futur për herë të parë në Parlament.
Gjithsesi, janë edhe një numër i konsiderueshëm partish rajonale, që me mandatet e tyre mund të ndihmojnë të majtën ose të djathtën për të formuar qeverinë e re spanjolle./Opinion.al
