Ka përfunduar orari zyrtar i zgjedhjeve në Maqedoninë e Veriut për Presidentin dhe qeverinë e re. Për zgjedhjet presidenciale ky është raundi i dytë i votimeve. Më shumë detaje në lidhje me votimet atje, na dha në një komunikim për Klan News gazetarja Teuta Buçi.
Ajo tha se është mbyllur pjesa më e madhe e vendeve të votimit. Përgjithësisht procesi zgjedhor ka kaluar qetë pa ndonjë incident serioz.
“Sipas informatave zyrtare nuk ka pasur incidente serioze. Ka pasur ankesa të shumta nga ana e votuesve për shkak se anëtarët e Këshillave Zgjedhorë u kanë parashtruar pyetje nëse do votojnë vetëm për një palë zgjedhje, apo edhe për zgjedhje parlamentare dhe presidenciale, gjë që nuk është pritur mirë nga ana e votuesve duke e konsideruar këtë si shkelje të rregullave të procesit zgjedhor”, tha ajo.
KQZ ka thënë se kjo nuk është shkelje, ndërsa organizatat që merren me monitorimin e zgjedhjeve e kanë interpretuar këtë si shkelje zgjedhore.
“Ka qenë një ditë e qetë zgjedhore, nuk ka pasur probleme më të mëdha, më serioze dhe nuk ka pasur as probleme serioze teknike siç ishte herën e kaluar, ku shumica e vendvotimeve kishin pengesa dhe problema me aparatet biometrike për identifikimin e votuesve”, tha ajo.
Komisioni Shtetëror Zgjedhor dha të dhëna zyrtare se është kaluar pragu zgjedhor për vlefshmërinë dhe përzgjedhjen e presidentit. Deri në orën 17:00 ka pasur rreth 42% që kanë votuar për president të shtetit, ndërsa dalja zgjedhjet parlamentare ka qenë më e madhe rreth 46%.
“Sipas atmosferës së deritanishme, favorit, pritet që të fitojë kandidatja e mbështetur nga VMRO-DPME, Gordana Siljanovska”, raportoi gazetarja.
Nga informatat në terren, një pjesë e votuesve shqiptarë kanë votuar vetëm për zgjedhjet parlamentare duke refuzuar të votojnë për presidentin.
“Kanë marrë vetëm një fletë dhe kanë votuar vetëm për zgjedhjet parlamentare”, tha ajo.
Sipas praktikave të deritanishme pritet që rezultatet e para të publikohen rreth mesnatës. Rezultati përfundimtar duhet të publikohet 24 orë pas mbylljes së vendvotimeve.
