Zyra e Brendshme e Mbretërisë së Bashkuar ka caktuar të paktën 700 milionë funte për të menaxhuar ardhjen e emigrantëve me varka të vogla deri në vitin 2030.
Zyrtarët publikuan parashikimet në internet javën e kaluar, ndërsa Sekretari i Brendshëm James Cleverly fluturoi në Ruandë për të nënshkruar një traktat të ri për të “ndaluar anijet”.
Ata parashikojnë se kalimet në Kanal mund të vazhdojnë deri në vitin 2034.
Një zëdhënës i “Home Office” tha se do të ishte e papërshtatshme të komentohej mbi një projekt prokurimi në vazhdim. Por nga ana tjetër, informacioni i publikuar në faqen e internetit të kontratave të qeverisë tregon se “Home Office” dëshiron të paktën një partner të madh për ta ndihmuar në 2 projektet e mëdha për emigrantët deri të paktën në vitin 2030.
Objekti i parë është baza e shpëtimit dhe e mbërritjeve të Forcave Kufitare të Mbretërisë së Bashkuar në portet e Doverit, e njohur si Western Jet Foil.
Ky është një objekt i sigurt ku emigrantët e shpëtuar nga Kanali Anglez sillen fillimisht në breg, regjistrohen dhe u jepet trajtim urgjent mjekësor.
Pjesa e dytë e kontratës mbulon qendrën shumë më të madhe dhe të kritikuar më parë Manston, e cila ishte projektuar për të akomoduar deri në 1600 emigrantë, ndërsa zyrtarët përcaktojnë se ku t’i strehojnë ata.
“Qëllimi i Qendrës së Zbarkimit dhe Solas në Western Jet Foil dhe Qendrës Kombëtare të Pritjes në Manston është të regjistrojnë dhe përpunojnë individët që mbërrijnë në Mbretërinë e Bashkuar me gomone nga i gjithë Kanali Anglez. Qëllimi i këtyre qendrave është të sigurojnë një mjedis të sigurt duke i lejuar Forcave Kufitare të përpunojnë ardhjet me dinjitet dhe respekt”, thuhet në faqen e internetit.
Sipas planit, shpjegon faqja, partnerët e Home Office do të kryejnë shërbime të gjera “mbështjellëse” në të dy vendet, duke përfshirë ushqimin, sigurinë dhe mbështetjen mjekësore.
Zyrtarët kanë llogaritur se këto shërbime do të kushtojnë 700 milionë funte gjatë gjashtë viteve të para – dhe kontratat mund të zgjaten edhe me katër vite të tjera.
