Mbretëresha Britanike Elizabet do të vaksinohet në javët e ardhshme me vaksinën Pfizer-BioNTech kundër Covid – 19, e cila u miratua nga autoritetet shëndetësore britanike. Lajmi bëhet i ditur nga mediat vendase që njoftojnë se mbretëresha 94-vjeçare dhe burri i saj Princi Filip, 99 vjeç, do të vaksinohen si kategori prioritare për shkak të moshës së tyre dhe jo nën trajtimin preferencial, raportoi “Mail” të Dielën.
Sipas gazetës, çifti mbretëror do të bëjë publik vaksinimin e tyre për të “inkurajuar sa më shumë njerëz të jetë e mundur të vaksinohen”, pasi autoritetet kanë frikë se të ashtuquajturit “mohues” të vaksinave do të hedhin dyshime mbi popullatën.
Pallati Buckingham nuk iu përgjigj drejtpërdrejt kërkesave të Agjencisë Franceze për komente.
“Daily Mirror” raporton se shumë të famshëm në Mbretërinë e Bashkuar janë zotuar publikisht të vaksinohen për të mbështetur këtë fushatë.
Britania i dha “dritën jeshile” javën e kaluar vaksinës së re të koronavirusit të zhvilluar nga BioNTech dhe Pfizer kundër Covid-19.
Dozat e para pritet të dorëzohen të martën, në Shërbimin Shëndetësor Kombëtar Britanik (NHS) që i jep përparësi vaksinimit të njerëzve mbi 80 vjeç, punonjësve të kujdesit shëndetësor dhe punonjësve të shërbimeve.
Britania ka porositur 40 milion doza – të mjaftueshme për të vaksinuar 20 milion njerëz në një vend me 67 milion banorë.
Rreth 800,000 doza pritet të jenë në dispozicion brenda javës së parë.
Vaksina Pfizer/ BioNTech duhet të ruhet në një temperaturë prej të paktën -70 gradë Celsius dhe dozat prishen brenda pesë ditësh nën temperaturat normale të ngrirjes.
Për këtë arsye, Ministria e Shëndetësisë theksoi se vaksina do të jepet fillimisht në 50 spitale, duke pohuar se do të duhen disa orë për të shkrirë secilën vaksinë dhe për ta përgatitur atë për përdorim.
NHS (Shërbimi Shëndetësor Kombëtar Britanik) ka informuar mjekët e përgjithshëm se ata janë të gatshëm të fillojnë vaksinimet përmes shërbimeve lokale shëndetësore që nga 14 Dhjetori.
Ekipet e mjekëve vendas do të veprojnë në më shumë se 1.000 qendra vaksinimi në të gjithë vendin./Opinion.al
