Ndonëse Koço Kokëdhima është Sekretar për Reformën Strukturore dhe Emigracionin në PS, ai nuk do të jetë pjesë e mbledhjes së Kryesisë së partisë që do të zhvillohet sot.
Kokëdhima nuk është vënë në dijeni për mbledhjen. I pyetur nga ‘News24’, Kokëdhima theksoi se: “Nuk kam marrë asnjë njoftim për mbledhje”.
Mësohet se Kryesia e PS do të mblidhet në orën 18:00 për të diskutuar projektligjet që do të dërgohen në Kuvend ditën e enjte.
Ndërkohë, e pyetur nga ‘BalkanWeb’, zëdhënësja e Kryesisë së PS, Elisa Spiropali theksoi se kjo eshte nje mbledhje periodike dhe njoftimet bëhen nga kryetari.
“Takimi i sotëm në orën 18:00 është një mbledhje periodike që bëhet në Kryesinë e PS. Nuk mund të them se pse zoti Koço Kokëdhima nuk vjen”, tha Spiropali për ‘BalkanWeb’.
Pas heqjes së mandatit si deputet, Kokëdhima është distancuar nga roli i tij brenda PSsë, ndërsa shpesh herë në media është përfolur për një marrëdhënie jo të mirë mes tij dhe kryeministrit Rama. Në seancën plenare pritet të diskutohen ligjet për reformën në drejtësi, pr/ligji “Për menaxhimin e integruar të mbetjeve”, dhe ligji për kamerat e sigurisë.
