Grupi parlamentar i Partisë Socialiste është mbledhur ditën e sotme.
I pranishëm në këtë mbledhje është edhe kryeministri dhe njëherësh kryesocialisti, Edi Rama.
Në këtë mbledhje marrin pjesë edhe ministrat e rinj të kabinetit qeveritar, Ervin Hoxha (ministër i Brendshëm), Petrit Malaj (ministër i Financave), Pirro Vengu (ministër i Mbrojtjes).
Emrat e ministrave të rinj u njoftuan nga kryeministri Rama gjatë fjalës së tij në Kongresin e PS-së, ndërsa gjatë ditës së sotme pritet dhe dekreti i Presidentit Begaj për ata.
Në mbledhjen e sotme, Rama do të ketë një prezantim më nga afër me anëtarët e rinj të kabinetit të qeverisë. Ndërkohë, kjo është mbledhja e parë që Niko Peleshi zhvillon me grupin parlamentar të PS-së, si kryetar i këtij grupi.
Mësohet se në këtë mbledhje pritet të ketë diskutime edhe përsa i përket zhvillimeve brenda partisë dhe ndryshimeve në kabinet.
Pasditen e sotme për shkak të ndryshimeve në qeveri, pas dekretit të Presidentit Begajt për ministrat e rinj, në orën 18:00 do të mblidhet Kuvendi në një seancë të posaçme për të miratuar emrat e rinj të kabinetit qeveritar.
