Një program i ngjeshur me takime dhe kontakte ndërkombëtare është parashikuar në axhendën e Kryeministrit grek Kyriakos Mitsotakis ditën e sotme dhe të nesërme lidhur me mbledhjen informale që zhvillohet në Athinë për Ballkanin.
Në të do të marrin pjesë një sërë liderësh ballkanikë, Presidenti i Këshillit Evropian Charles Michel dhe Presidentja e Komisionit Europian Ursula von der Leyen, ku Greqia do të luajë një rol dominues në debatin për të ardhmen evropiane të rajonit e më të gjerë.
Mirëpo, një mysafir surprizë pritet të jetë edhe presidenti ukrainas Volodymyr Zelensky, ardhja e të cilit u mbajt si sekret nga Athina ashtu dhe nga vetë Zelensky. Ky i fundit, së fundmi ka qenë në një turne evropian dhe ka vizituar Suedinë, Danimarkën dhe Holandën.
Të pranishëm do të jenë edhe presidenti i Serbisë, Aleksandar Vuçiç, i Malit të Zi , Jakov Milatoviç, kryeministri i Maqedonisë së Veriut, Dimitar Kovacevski, i Kosovës, Albin Kurti, presidentja e Këshillit të Ministrave të Bosnje dhe Hercegovinës, Borjana Kristo, dhe presidentja e Moldavisë , Maya Sandu. Në diskutim do të marrin pjesë edhe liderët e vendeve të rajonit që janë anëtare të BE-së dhe më konkretisht bëhet fjalë për kryeministrin e Bullgarisë Nikolai Denkov, i Kroacisë Andrej Plenkoviç dhe i Rumanisë Ion-Marcel Ciolakou.
Në çdo rast, mungesa e madhe në konferencë do të jetë Shqipëria, e cila sipas Protothema, me mungesën e saj vë në pah “ngrirjen” e marrëdhënieve greko-shqiptare, pas burgosjes së kryebashkiakut të Himarës, Fredi Beleri.
Duke qenë se në asnjë rrethanë zoti Rama nuk mund të ftohet për të diskutuar perspektivën europiane të vendit të tij, ndërkohë që z. Beleri qëndron në burg, shkruan Protothema, ftesa i është dërguar zyrës së presidentit shqiptar, Bajram Begaj, i cili ka refuzuar dhe kështu Shqipëria nuk do të marrë pjesë.
Është e dukshme, megjithatë, se pas “pranverës” së viteve të mëparshme, marrëdhëniet mes Athinës dhe Tiranës janë në një nivel “të ulët barometrik”.
Më gjerë, megjithatë, duke pasur parasysh se këtë vit 20 vjet nga Deklarata e Selanikut, e cila nënvizonte se e ardhmja e Ballkanit është brenda BE-së, zoti Mitsotakis dëshiron të dërgojë mesazhin se Greqia vazhdon të punojë për këtë qëllim si një forcë udhëheqëse në Ballkan. “Greqia, e cila ka forcuar gjurmën e saj gjeopolitike dhe energjetike në rajon gjatë katër viteve të fundit, qëndron pranë Ballkanit Perëndimor si anëtare e familjes evropiane, por edhe si ekonomia më e madhe në rajon dhe dëshiron integrimin e tyre europian, për të cilën ka kushte”, theksojnë burime qeveritare, duke dërguar kështu një mesazh që në këtë fazë adresohet kryesisht në Tiranë./Opinion.al
