Ditën e sotme Lëvizja Socialiste për Integrim mbajti Mbledhjen e Kryesisë. Fjalën e mori kryetarja e re e kësaj partie, Monika Kryemadhi e cila lajmëroi hapjen e një sezoni të ri politik për këtë parti.
Kryemadhi u shpreh se detyra e kësaj partie është ti japë një dimension të ri mendimit opozitar në vend.
Në fjalën e saj ajo foli gjithashtu edhe për zgjedhjet e 25 qershorit ku u shpreh se LSI u sulmua nga partitë e tjera, por përsëri arriti të triumfonte.
“Sot LSI është më e fortë se asnjëherë pasi kaloi me sukses një sprovë të jashtëzakonshme si 25 Qershori ku ajo u targetua në mënyrë jodemokratike e kriminale për ti dhënë një pushtet të pakontrolluar oligarkisë dhe malavites për të garantuar kapjen e shtetit e të institucioneve në çdo qelizë.
LSI edhe pse konkuroi e vetme dhe u sulmua pacipësisht e pabesisht nga forcat e së keqes tregoi qëndrueshmëri, rritje e vitalitet . “ – u shpreh Kryemadhi
Ajo gjithashtu tha se në këtë mbledhje do të nis edhe riorganizimi i strukturave të LSI-së në mënyrë që të realizohet me sukses misioni opozitar që mban tashmë kjo parti.
Në fund të fjalës së saj kryetarja e LSI-së i bën thirrje të gjithë personave që duan të kontribojnë në këtë mision të bashkohen.
“Ky proces do të shoqërohet me hapjen ndaj cilido që kërkon të përfshihet e të kontribuojë në këtë aksion që synon zgjimin e bashkimin e shumicës së shqiptarëve për të vendosur sovranitetin e tyre mbi qeverisjen dhe institucionet.
Do ta fillojmë riorganizimin me analizat e rezultateve për cdo qark e njësi vendore për të forcuar punën e strukturave për të ardhmen.” – tha ajo.
