Deputeti i PD, Ervin Salianji deklaroi se vrasjet në Shqipëri vijojnë të mbeten pa autor.
Në një deklaratë për mediat, Salianji tha se mbi 90% e ngjarjeve kriminale në Shqipëri mbeten të pazbardhura.
Ai është ndalur gjithashtu edhe tek ngjarja e Pogradecit ku mbeti i vrarë Egli Proga, sipas tij ishte media ajo që publikoi të vërteten e ngjarjes e cila më pas u përgënjeshtrua nga policia.
“Sot unë besoj që publiku priste të thuhej se për shkak të ngjarjeve kriminale, të gjitha vrasjeve të ndodhura, sot kishte një çerek rasti të zbuluar në Velipojë, të gjithë rastet e tjera kriminale janë me autorë në kërkim. Jo vetëm që këtu kanë mundësi të vrasin, jo vetëm që policia nuk ka fuqi t’i parandalojë, por nuk ka fuqi as t’i kapë pasi vrasin dhe sot jemi në shkallën mbi 90% të moszbulimit të ngjarjeve kriminale në Shqipëri.
Apo akoma më keq aty ku e zbulon media dhe dua të bëj edhe një falenderim publik për të gjithë ju, për rastin e Pogradecit, Policia e Shtetit jo vetëm del dhe manipulon ngjarjen e sapondodhur, por e pangjarë në 34 vite në Shqipëri, del në deklaratë zyrtare Policia e Shtetit dhe përgënjeshtron Prokurorinë e cila ka nisur hetim dhe ka guximin për shkak se kryeministri e sulmon, të nisë hetim për shpërdorim detyre për Policinë e Shtetit”, tha Salianji.
