Policia e Tiranës ka arrestuar dy persona të cilëve iu janë sekuestruar 2 kg e 30 gramë kokainë, ndërsa është shpallur në kërkim bashkëpunëtori i tyre.
Sipas policisë, të arrestuarit janë identifikuar si Izmir Bahiti dhe Nertil Dalipi, të dy banues në Elbasan.
Arrestimi i tyre është bërë në rrugën “Mikel Maruli” ku shërbimet e Policisë kanë lokalizuar automjetin me drejtues shtetasin N. D. dhe pasagjer shtetasin I. B.
Gjatë kontrollit të automjetit u gjetën 2 pako me lëndë të dyshuar narkotike kokainë, me peshë rreth 2 kg e 30 gramë, të cilat u sekuestruan në cilësinë e provës materiale, së bashku me automjetin, 5250 euro, 120.00 lekë të rinj dhe 3 aparate celulare.
Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale.
