Një tragjedi e re ka ndodhur në afërsi të brigjeve të Libisë, pas përmbysjes së një anije të stërmbushur me refugjatë dhe ekziston frika për shumë të vdekur.
Ekziston frika se mbi 100 refugjatë kanë vdekur pas përmbysjes së një anije afër brigjeve të Libisë, ka deklaruar Organizata Ndërkombëtare për Migracion, duke u mbështetur në deklaratat e të mbijetuarve.
Të mbijetuarit deklaruan se mbi 650 refugjatë kanë qenë në anije në momentin e aksidentit. Anija ishte nisur nga Libia dhe pjesa më e madhe e refugjatëve ishin nga Maroku, raporton express.
Roja detare e Italisë arriti të shpëtojë 560 persona, ndërsa të tjerët konsiderohen të zhdukur dhe në bazë të zyrtarëve, mund të jetë kjo një nga tragjeditë më të mëdha, që nga fillimi i krizës së refugjatëve.
Zyrtarët e Organizatës Ndërkombëtare për Migracion theksuan se refugjatët shumë rrallë përdorin anije kaq të mëdha dhe të rënda, gjatë përpjekjeve për të arritur nga Libia deri në Evropë.
