Mjeku i njohur Ilir Alimehmeti, edhe pse mbeti jashtë parlamentit ka një falënderim për të gjithë ata që e votëbesuan. Përmes një postimi në rrjetin social Facebook, ai shprehet mirënjohës për mbështetjen në këto zgjedhje, duke theksuar se “rezultati nuk është fundi”.
Sipas Alimehmetit, çdo votë që u hodh nuk ishte vetëm për një emër, por për një mënyrë të re të të bërit politikë.
Për mjekun e njohur, kjo fushatë nuk ishte thjesht një sfidë elektorale, ishte një thirrje për ndërgjegje, për bashkim rreth vlerave që sipas tij na bëjnë njerëz si: ndershmëria, puna, dinjiteti.
“Të dashur qytetarë, miq e bashkëluftëtarë të ndershmërisë, 18.125 herë ju i thatë “po” shpresës, ndryshimit dhe të vërtetës. 18.125 zemra besuan se politika mund të jetë ndryshe – më njerëzore, më e drejtë, më pranë qytetarit. Për këtë, ju jam thellësisht mirënjohës. Kjo fushatë nuk ishte thjesht një sfidë elektorale – ishte një thirrje për ndërgjegje, për bashkim rreth vlerave që na bëjnë njerëz: ndershmëria, puna, dinjiteti. Çdo votë që hodhët nuk ishte vetëm për një emër, por për një mënyrë të re të të bërit politikë. Ju faleminderit që qëndruat krah meje, që më dhatë forcë me fjalët, buzëqeshjet dhe besimin tuaj. Faleminderit që më lejuat të jem zëri juaj. Rezultati nuk është fundi – është fillimi i një rrugëtimi të gjatë dhe të ndershëm, që do të vazhdojë me të njëjtin përkushtim, pa u ndalur. Me gjithë shpirtin, Ilir Alimehmeti”, shkruan ai krahas fotos me familjen.
Edhe kreu i PD Sali Berisha ishte i të njëjtit mendim dje kur u pyet nga gazetarët për Alimehmetin. Ai e cilësoi një intelektual dhe luftëtar që tregoi se njerëzit e duan.
