Shkëlzen Berisha, sot, ka ironizuar mbështetësit e ish-ministrit të Brendshëm, Saimir Tahiri, të cilët ende vazhdojnë të qëndrojnë para Kryesisë së Kuvendit.
Përmes një shënimi në Facebook, ai shkruan se protesta pro rritjes së taksave pasohet nga protesta masive pro trafikut të drogës.
“Protesta pro rritjes së taksave pasohet nga protesta masive pro trafikut të drogës”, -shkruan Shkëlzen Berisha.
Mbështetësit e Tahirit janë mbledhur para Kryesisë së Kuvendit që në fillim të Komisionit të Mandateve dhe nuk kanë lëvizuar nga aty për asnjë moment.
Shumë prej tyre u mblodhën tek shtëpia e ish-ministrit të Brendshëm, ndërsa dhjetëra të tjerë sot e duartrokitën dhe fishkëllyen ndërsa hynte në Kryesi për mbledhjen. Por Shkëlzen Berisha e quan këtë protestë masive pro trafikut të drogës.
Ish-ministri i Brendshëm, Saimir Tahiri, dje në mbrëmje, ka sulmuar Shkëlzen Berishën nga studio e emisionit “Opinion”; në lidhje me tragjedinë e Gërdecit, ku humbën jetën 26 persona.
Pak më vonë, në lidhje me këto akuza, reagoi Shkëlzen Berisha, i cili i kujton Tahirit të pyesë shefin e tij (Edi Rama) se ka më shumë se 200 telefonata me Mihal Deliorgjin.
Këshilli i Mandateve dhe Rregulloreve është mbledhur këtë paradite për kërkesën e Prokurorisë së Krimeve të Rënda për heqjen e imunitetit të Saimir Tahirit dhe dhënien e autorizimit për arrestimin e tij.
Vetë ish-ministri i Brendshëm është i pranishëm në këtë mbledhje, por do të jetë avokati i tij Artan Hadaraj që do të flasë për të. Ndërsa organi i akuzës është përfaqësuar nga kreu i Prokurorisë së Krimeve të Rënda, Besnik Hajdarmataj.
