Kryedemokrati Sali Berisha ka mbërritur në SPAK rreth orës 10:00. Ish-kryeministri Berisha është thirrur nga prokurorët e posaçëm për të dhënë shpjegime në lidhje me një kallëzim të bërë nga gjyqtarja Irena Gjoka. Para hyrjes në SPAK, në një deklaratë para mediave ai u shpreh:
“Nuk i njoh dosjet konkrete, por natyrisht si institucioni i bashkëpunimit me krimin, ka me qindra mijëra qytetarë, të cilët këtu kanë zemërimin e madh, kanë problemet e mëdha. Atëherë është Edi Rama vetë me Gjipenë. Bëhet fjalë për Gjipenë. Ua mori Gjipenë…
Dora e mafies, dora e qeverisë është kudo”, tha Berisha për mediat përpara se të futej brenda ambienteve të SPAK.
Letra e SPAK
PROKURORIA E POSAÇME KUNDËR KORRUPSIONIT DHE KRIMIT TË ORGANIZUAR
URDHËR
“Për paraqitjen e shtetasit”
Në Tiranë, viti 2025, muaji Qershor, datë 03.
Unë Elvin Gokaj, Prokuror në Prokurorinë e Posaçme Kundër Korrupsionit dhe Krimit të Organizuar, në mbështetje të nenit 312 të K.Pr.Penale;
URDHËROJ:
Shtetasin Sali Berisha, i datëlindjes 15.10.1944, i biri i Ramë dhe Shiqere, lindur në Tropojë dhe banues në Tiranë, rruga “Mustafa Matohiti”, Nd.36, H. 1, Njësia Administrative nr. 2. Tiranë, identifikuar nga numri personal E40701031R, në datën 10.06.2025, ditën e Martë, ora 10:00, të paraqitet në Prokurorinë e Posaçme kundër Korrupsionit dhe Krimit të Organizuar, pranë Hetuesit të Byrosë Kombëtare të Hetimit z. Ardit Neli, me dokument identifikimi me vete.
Paraqitja e shtetasit të mësipërm kërkohet me qëllim pyetjen e tij si person që ka dijeni për rrethanat e hetimit, të lidhur me hetimet paraprake të procedimit penal Nr.193 viti 2024, të Prokurorisë së Posaçme kundër Korrupsionit dhe Krimit të Organizuar.
Në rast mosparaqitje në ditën dhe orën e caktuar, pa pasur pengesa të ligjshme, në bazë të nenit 312 të K.Pr.Penale, personi i njoftuar paralajmërohet se do të urdhërohet shoqërimi shoqërimi i detyrueshëm.
Njoftimi i mësipërm të kryhet me anë të shërbimit postar.
PROKURORI
Elvin GOKAJ
