Mazhoranca rrëzon opozitën: S’ka veting për ministrin Xhafaj

Deputetët e Partisë Demokratike në Komisionin e Ligjeve dhe të Sigurisë propozuan disa ndryshime, që në bindjen e tyre, e bëjnë realisht të zbatueshëm ligjin e vettingut në polici. Partia Demokratike propozoi 3 ndryshime thelbësore.
I pari është që ministri i Brendshëm, shefi i tij i kabinetit dhe zëvendësministrat të jenë subjekt i Vettingut, sipas të njëjtave kritere për trupën e policisë. Po ashtu PD propozon që Organet e Vettingut të jenë jopolitike dhe jo nën varësinë e Ministrisë së Brendshme apo qeverisë, siç parashikohet në draft. Gjithashtu propozimi i tretë i PD parashikon që shtrija e Vettingut për ndalimin e përfshirjes së policëve në aktivitete politike të behet 5-10 vjet nga 3 vjet që është në draftin aktual.
Propozimet kryesore të Partisë Demokratike nuk janë pranuar nga mazhoranca. Sipas kësaj force politike rrëzohet alibia e ngritur një ditë më parë nga ministri i Brendshëm se ishte i gatshëm që Vettingu të niste prej tij.