Kryeministri i vendit Edi Rama në eventin për çeljen e Programit për Përshpejtimin e Pranimit të Pagesave Elektronike në partneritet me Mastercard Europe, u shpreh se është shumë e rëndësishme që Mastercard hyn në Shqipëri, pasi do të sjell lehtësim në pagesa.
Rama thekson se hyrja e Mastercard në Shqipëri do të sjellë thellimin e revolucionit dixhital në vend. Kreu i qeverisë vuri theksin te negativiteti i pagesës cash, ndërsa u shpreh se 95% e shërbimeve në Shqipëri bëhen online dhe kursehen 650 milionë Euro në total tek qytetarët.
“Për ne është shumë e rëndësishme që Mastercard hyn në Shqipëri, si rezultat i faktit që sot e gjen tregun shqiptar të gatshëm për të adoptuar veten me produktin e Mastercard. Për ne është shumb e mirëpritur ardhja e Mastercard sepse është koha që revolucioni ynë dixhital të thellohet për përmirësimin e pagesave në vend. Ne kemi bërë një punë të mirë me shërbimet online. Kemi sot mbi 95% të shërbimeve të shtetit online. Nuk kemi arritur të bëjmë online martesën se duhen dëshmitarë, mbase do të arrihet, por nuk e kemi arritur dhe një sërë shërbimesh si marrja e gjurmëve të gishtave që kërkojnë praninë e individëve. Me këtë revolucion ne kemi praktikisht 620 milion Euro të kursyera, por ajo që është më shokuese është se janë kursyer vajtja ardhje të barabarta me 25 rrotullime rreth tokës. Duhet të kemi parasysh që nga platforma e shërbimeve online kanë përfituar të gjithë shqiptarët që janë jashtë të cilët pa këtë platformë për çdo shërbim duhet të vinin në Shqipëri.
Kur vijmë tek pagesat ne kemi të dhëna shumë të frikshme negativisht sa i përket përdorimit masiv të kesh-it dhe përdorimit minimalit të kartave të kreditit ndërkohë që e dhëna pozitive është që kur ne kemi marrë detyrën kanë qenë rreth 30% e qytetarëve me llogari bankare dhe sot kanë shkuar në 80% dhe ana tjetër drejtori e tha Mastercardi na ka nxjerrë herë pas here me shkëlqim në klasifikimet e tij në vendet më të frekuentuara turistike“, thotë Rama.
Kryeministri u ndal edhe tek turizmi ku përmendi se të ardhurat nga ky sektor kanë shkuar në thuajse 5 miliardë Lekë, teksa theksoi edhe faktin se vetëm 4% e transaksioneve bëhen me kartë krediti.
“Shqipëria sot në turizëm është në majë si vendi me ritjen më të madhe të turistëve mes një grushti vendesh dhe nga ana tjetër ne konstatojmë që rritja nga të ardhurat e turizmit ka shkuar në thuajse 5 miliardë, mirëpo vetëm 4% e transaksioneve bëhen me kartë krediti dhe kjo tregon se sa i madh është boshllëku dhe tregon se sa shumë para të cila nuk i takojnë atyre që i mbajnë duhet tu shkojnë mbrapsht qytetarëve dhe sa shumë të dhëna të tjera duhet t’ju shkojnë qytetarë përmes taksave gjë për të cilën ne besojmë që dixhitalizimi i pagesave është instrumenti më i drejtëpërdrejtë.
Hotelet, restorantet, marketet do të mund të aksesojnë pa qenë të shtrenguar që të dalin t’i paguajnë në treg. Mastercard ka një limit të caktuar për përdorues të caktuar që nuk paguajnë asnjë komision deri në një prag vjetor, mbi pragun nis komisioni. Përveç këtyre, ka një tjetër aspekt që është 83% e atyre që e përdorin këtë kanë një rritje të lëvizjes të numrit të klientëve dhe transaksioneve”, shprehet Rama.
