Policia e Tiranës ka ndaluar një 55-vjeçar, pasi ka përfituar shuma parash me pretendimin për të ndihmuar një të mitur të sëmurë për kurimin e tij.
Uniformat blu gjithashtu kanë proceduar në gjendje të lirë, dy persona të tjerë.
Mësohet se 55-vjeçari Artur Karati ka kryer mashtrim kompjuterik nga një profil fals në rrjetin social Instagram. Ai ka përdorur fotografi të marra në internet të një të mituri të sëmurë.
Për këtë arsye ka përfituar shuma parash nga qytetarë të ndryshëm me pretendimin se do të përdoreshin për kurimin e të miturit.
“Specialistët e Sektorit për Hetimin e Krimeve Kibernetike, në bashkëpunim me Seksionin e Forcës së Posaçme Operacionale, kanë ndaluar shtetasin në kërkim A. K., 55 vjeç, banues në Përmet. Gjithashtu, referuan materialet në Prokurori ku nisi procedimi në gjendje të lirë për shtetasit S. K., 42 vjeç dhe B. I., 47 vjeç, të dy banues në Tiranë.
Shtetasi A. K., me anë të mashtrimit kompjuterik të kryer nga një profil fals në rrjetin social Instagram, duke përdorur fotografi të marra në internet, të një shtetasi të mitur të sëmurë, ka përfituar shuma parash nga shtetas të ndryshëm, me pretendimin se do të përdoreshin për kurimin e të miturit.
Punohet për identifikimin e shtetasve të tjerë të implikuar në këtë rast”, njofton policia.
Ndërkohë autoritetet po punojnë për identifikimin e personave të tjerë që mund të jenë implikuar në këtë rast.
