Policia e Tiranës ka arrestuar administratorin e një firme ndërtimi në kryeqytet, pasi akuzohet se ka mashtruar një person, duke përvetësuar shumën prej 65 mijë Euro dhe 3.350.000 lekë.
Këto shuma parash, i prangosuri Namik Pelivani i ka marrë për blerjen e një apartamenti, të cilin e kishte shitur edhe më parë.
Pelivani, i lindur në Tepelenë dhe banues në Tiranë, ishte proceduar penalisht edhe disa herë më parë.
“Arrestimi i shtetasit të sipërpërmendur u bë pasi ky shtetas ka mashtruar shtetasin A.L., të cilit i ka marrë 65 000 Euro dhe 3 350 000 lekë për blerjen e një apartamenti me sipërfaqe 107.69m2, në zonën e Yzberishtit, apartament të cilin e kishte shitur më parë me kontratë noteriale fiktive në vitin 2013 dhe të rinovuar në vitin 2016, për t’i krijuar besueshmëri klientit”, njoftojnë uniformat blu.
I arrestuari nuk ka përpiluar fatura shitjeje tatimore duke kryer transaksione monetare jashtë zyrave të noterit dhe jo me bankë, me qëllim shmangien e deklarimit të të ardhurave.
“Në cilësinë e provës materiale të dyshuarit iu sekuestruan 6 kontrata noteriale si dhe dokumenta të ndryshme si certifikata, skica apartamentesh dhe 1 aparat telefoni celular”.
Theksojmë se ky shtetas është proceduar më parë edhe 5 herë të tjera nga policia për vepra të ndryshme penale”, sqaron policia.
Materialet proceduriale në ngarkim të shtetasit të mësipërm, i kaluan Prokurorisë pranë Gjykatës së Shkallës së Parë Tiranë, për veprat penale “Mashtrimi me pasoja të rënda” dhe “Fshehja e të ardhurave”.
