Qeveria italiane po mendon të vendosë masa të reja anti-COVID , gjatë festave të fund vitit. Këto masa pritet të merren pas shqetësimeve në rritje për një valë të re infektimesh, në muajin janar.
Mediat italiane shkruajnë se qeveria pritet të vendosë të gjithë Italinë në “zonë të kuqe” që nga data 24 dhjetor, duke zgjatur orarin e ndalimqarkullimit dhe ndalimin e lëvizjeve jo të domosdoshme. Pritet të përjashtohen nga ky rregull komunat e vogla.
Do të qëndrojnë të mbyllura gjithashtu edhe vendet e argëtimit të cilat grumbullojnë njerëz, baret, restorantet, pastiçeritë dhe dyqanet dhe ndoshta do të shoqërohet edhe me një shtetrrethim.
“Ne të gjithë kemi qenë të përfshirë në betejën kundër Covid-19 për shumë muaj, me sakrifica të mëdha dhe të vogla. Komuniteti ynë kombëtar, përkundër një mijë vështirësive, ka arritur të tregojë një frymë të fortë kohezioni dhe një ndjenjë të madhe përgjegjësie. Unë jam i bindur se ne do të vazhdojmë ta tregojmë këtë qëndrueshmëri edhe në javët në vijim, me rastin e festave të Krishtlindjeve. Ne duhet të vazhdojmë të angazhohemi dhe të qëndrojmë vigjilent për të luftuar infeksionin “, shkruan kryeministri Giuseppe Conte.
Vendimi pritet të merret të hënën, pas takimit që kryeministri Conte do të zhvillojë me ministrat e kabinetit dhe komitetin shkencor, që e ka këshilluar qeverinë që nga nisja e pandemisë./ Opinion.al
