Autoritetet vijojnë kontrollet për zbatimin e masave anti-COVID. Policia e Shtetit njofton se gjatë fundjavës janë vendosur 2106 masa administrative në të gjithë vendin.
Gjatë fundjavës, janë ndëshkuar me gjobë 3.000 lekë secili, 2005 qytetarë që janë konstatuar duke lëvizur pa maskat mbrojtëse. Ndërsa, 7 shtetas të infektuar me COVID-19, kanë shkelur rregullat e vetëkarantinimit të detyrueshëm dhe janë ndëshkuar me gjobë 700.000 lekë secili.
Gjithashtu, gjatë kontrolleve, efektivët kanë konstatuar 9 lokale, në ambientet e të cilëve kishte muzikë pas orës 20:00 dhe nuk respektoheshin protokollet e sigurisë. Secili prej subjekteve është ndëshkuar me masën administrative 1.000.000 lekë.
Policia informon se janë shoqëruar në ambientet e Policisë në të gjithë vendin, 21 shtetas që nuk kanë pranuar t’i tregojnë punonjësve të Policisë dokumentin e identifikimit. Pasi janë identifikuar ata janë ndëshkuar me gjobë 3.000 lekë dhe më pas janë lënë të lirë.
Po gjatë fundjavës, pas orës 22:00 janë konstatuar edhe 85 qytetarë që lëviznin në rrugë pa arsye të domosdoshme, të cilët janë ndëshkuar me gjobë 10.000 lekë secili. / Opinion.al
