Një 22-vjeçar shqiptar, i quajtur Kozma Papa, është dënuar me burgim të përjetshëm në Britaninë e Madhe, pasi akuzohet se vrau bashkatdhetarin e tij, Bledi Petraj, 37 vjeç në 4 shkurt të këtij viti, në zonën e Southgate-it në verilindje të Londrës.
Sipas BBC, të dy shqiptarët, si vrasësi dhe viktima njiheshin me njëri-tjetrin dhe kishin pasur një përplasje fizike fillimisht në një kafene, pasi viktima kishte refuzuar t’i jepte dorën të riut.
Në gjyq u mësua se 45 minuta pas sherrit të parë, të dy ata kishin shkuar në një zonë tjetër të Londrës, ku secili mbante thika të mëdha me vete. Të dy, sipas prokurorit të çështjes, i drejtonin njëri-tjetrit thikën, derisa viktima Bledi Petraj nuk mundi të mbrohej më.
Mësohet se Kozma Papa i kapi thikën dhe me dy thika në duar, në kohën kur viktima kishte rënë në tokë, e ka goditur 13 herë në mënyre të vazhdueshme dhe Petraj vdiq në spital nga plagët e marra atë pasdite.
Për këtë krim Kozma Papa është dënuar me burgim të përjetshëm, por, Gjykata Qendrore në Londër kërkoj për Papën që të vuaj minimalisht 20 vjet heqje lirie dhe nëntë muaj për posedim të një arme. Autori i vrasjes u kap nga Policia duke u larguar me makinë jashtë Londrës dhe e pranoj vrasjen e kryer.
Në një deklaratë, motra e Petraj tha: “Zgjohem në mëngjes, duke u përpjekur të bind veten se ishte thjesht një makth. Nuk mund të festojmë më. Çdo ditëlindje familjare është e mbushur me lot sepse Bledi mungon”.
Prindërit e tij shtuan se Petraj ishte “në vendin e gabuar në kohën e gabuar, duke u përballur me një përbindësh me thikë në dorë, duke goditur pa mëshirë”.
Gjykata tha se Papa është një shtetas shqiptar i cili hyri ilegalisht në MB në shtator 2022.
