KALIFORNI (SHBA) – “Ata ishin një çift myslimanësh të devotshëm”, kështu i përshkruan mbarë media botërore autorët e masakrës së djeshme në Kaliforni, me 14 viktima.
Daily Mail raporton se Syed Rizvan Farook, 28 vjeç, i lindur në SHBA ndodhej në festën që zhvillohej në një agjenci për ndihmën ndaj njerëzve me aftësi të kufizuar, por u largua i nevrikosur për t’u rikthyer sërish i armatosur së bashku me bashkëshorten e tij Tashfeen Malik, 27 vjeç. Kolegu i tij i punës rrefen se ishte ngjitur në tavolinë me të, kur befas ai u shkëput nga festa, duke lënë pallton në karrige.
“Unë u largova në banjë, kur dëgjova të shtënat”, vijon rrëfimin Patrick Baçari, kolegu i autorit. Farook, ishte specialist mjedisor ne departamentin e Shëndetësisë se qarkut dhe përshkruhet si musliman “i përkushtuar”. Ai thuhet se ka udhëtuar për në Arabinë Saudite në fillim të këtij viti dhe u kthye me një grua dhe një fëmijë.
Patrick Baçari thotë Farook ishte zhdukur për rreth një muaj në pranverë. Kur ai u kthye, morëm vesh se Farook ishte martuar, dhe gruaja që ai e përshkroi si një farmaciste u bashkua me atë pak më vonë, së bashku me fëmijën. Ai nuk njihej për sjellje të cuditshme, edhe pse së fundi kishte nisur të rriste mjekren, raportojnë kolegët.
Ngjarja
Të paktën 14 persona janë vrarë dhe 17 të tjerë janë plagosur nga të shtënat në një qendër të shërbimeve sociale në Kaliforninë jugore. Policia tha se 2 sulmues të armatosur kanë hyrë në qendrën Inland në qytetin San Bernadino në lindje të Los Angeles në orën 11:00 (ora lokale në SHBA), të ditës së djeshme.
Sulmuesit janë raportuar të kenë qenë të armatosur rëndë ndërsa kanë pasur të veshur edhe jelekë anti-plumb.
Pas të shtënave, personat e armatosur janë larguar nga qendra dhe të njëjtit janë ndjekur nga policia. Forcat e sigurisë i kanë vrarë dy të dyshuar, nga të cilët, një mashkull dhe një femër. Në qendrën ku kanë ndodhur, vrasjet policia e ka gjetur një mjet shpërthyes.
