Kryeministri i Kosovës, Albin Kurti ka reaguar pas sulmit të armatosur që ndodhi të mërkurën në një shkollë fillore në Beograd, ku mbetën të vrarë tetë nxënës dhe roja me autor një nxënës të klasës së shtatë.
Kurti përmes një postimi në Twitter ka shprehur ngushëllime për viktimat dhe familjet e tyre.
“Dëshiroj të shpreh ngushëllimet e mia më të thella për viktimat e të shtënave në shkollë në Beograd dhe për familjet e tyre. Gjithashtu u uroj shërim sa më të shpejtë të lënduarve në këtë ngjarje tragjike”, ka shkruar Kurti.
Lidhur me këtë ngjarje dje ka reaguar edhe presidentja Vjosa Osmani. Osmani në një postim të Twitter u ka shprehur ngushëllime familjarëve të nxënësve që humbën jetën.
Çfarë ndodhi në shkollën fillore në Beograd:
14-vjeçari i identifikuar si Kosta.K ka ekzekutuar sot me armë zjarri 9 persona në një shkollë fillore “Vladislav Ribnikar”. Ai ka vrarë rojën dhe 8 nxënës të klasës. Kosta është student ekselent dhe fitues i olimpiadës së matematikës, ndërsa më herët ishte renditur në vendin e tretë në olimpiadën e historisë. Mediat aludojnë se ishte ky mllef që pati me mësuesen e historisë që e shtyu drejt aktit monstruoz.
Ai mori armën e zjarrit që e kishte i ati dhe qëlloi me breshëri plumbash rreth orës 08:00 kur zakonisht nis mësimi. Pasi kreu krimin ai u arrestua menjëherë nga policia serbe.
