Policia ka dhënë njoftim zyrtar për arrestimin e Elmilind Dylit, një prej autorëve të dyshuar të masakres së Velipojës.
Uniformat blu bëjnë me dije se prej disa ditësh kishin siguruar informacion se në zonën e Riminit fshihej një shtetas i kërkuar për vrasje. Bazuar në këto informacione, Policia e Riminit organizoi operacionin policor të koduar “Rimini”, në kuadër të të cilit lokalizoi, kapi dhe shoqëroi Elmilind Dylin.
Pas verifikimeve, mëngjesin e sotëm është bërë identifikimi i thelluar i Elmilind Dylit, i cili u arrestua me qëllim ekstradimin drejt Shqipërisë.
Dyli ishte shpallur në kërkim ndërkombëtar nga Interpol Tirana për veprat penale “Vrasja” dhe “Prodhimi dhe mbajtja pa leje e armëve, armëve shpërthyese dhe municionit luftarak”, në lidhje me ngjarjen e ndodhur në vitin 2021, në Velipojë, ku mbetën të vrarë me armë zjarri 4 persona.
Masakra me 4 të vrarë ndodhi më 27 Qershor të 2021-t mes familjes Gocaj dhe Verracaku. Palët ishin pronarë hotelesh në Velipojë dhe shkak për ngjarjen e rëndë u bë një konflikt për vendosjen e çadrave në plazhin para bizneseve të tyre.
Nga të shtënat mbetën të vrarë më armë zjarri vëllezërit, Edmond e Xhovani Gocaj, kamarieri i biznesit të tyre Myrezim Zeneli, si dhe Kujtim Verracaku.
Ndërsa të plagosur mbetën Hasan Verracaku dhe Elmilind Dyli. Këta të fundit u arrestuan pas ngjarjes së rëndë dhe në atë kohë, gjykata i la në burg pa afat./Opinion.al
