Lokali ku ndodhi masakra me 3 viktima dhe 8 të plagosur, në pronësi të familjes Çapja është më se modest. Në këtë vend kishte zgjedhur familja të mblidhej për të festuar kthimin e Arnoldit, djalit të Agron Çapjas.
Ata që e njohin zonën, por sigurisht edhe këtë lokal, tregojnë se ai gjatë mbrëmjeve qëndonte thuajse gjithnjë i mbyllur. Lokali ndodhet pak metra pasi kalon perimetrin e stadiumit “Elbasan Arena”, në rrugën drejt Librazhdit, që njihet me emrin lagjja “Emin Matraxhiu”. Gjithçka ka mbetur nga ora 19:54 e së mërkurës, janë muret gjithë vrima nga breshëria e plumbave, xhamat e thyer e karrige të rrëzuara.
Nga dëshmitarët që pranuan të flasin shumë shkurt dhe pa i identifikuar, mësuam se lokali “Rrapi i Gonit” nuk frekuentohej shumë nga personat e rastësishëm. Vetëm ndonjëri që lante makinën aty para tij mund të ulej për të kthyer një gotë me të shpejtë. Nuk kishte as kamerier, as banakier të punësuar.
Gjithçka e administronin të afërmit e Çapjes. Ndërsa në mbrëmje zakonisht qëndronte i mbyllur. Vetëm në raste si ai i së mërkurës, kur familjarë, të afërm e miq mblidheshin për të festuar.
Pikërisht aty, në lokalin në pronësi të Çapjes, vëllait të biznesmenit të vrarë në vitin 2005, ishin 4 anëtarë të familjes së tij. Vetë pronari mbeti i vdekur, bashkë me dy miq të familjes, ndërsa vëllai dhe dy nipërit e Sokol Çapjes, u plagosën./panorama/
