Mijëra mbështetës të qeverisë së Iranit kanë marshuar në Teheran, duke akuzuar Shtetet e Bashkuara dhe Izraelin për nxitje të protestave të dhunshme kundër qeverisë.
Komandanti i forcave elitë në Gardën Revolucionare të Iranit, Hossein Salami, ka paralajmëruar Shtetet e Bashkuara dhe Arabinë Saudite që të mos shtyjnë Teheranin drejt një hakmarrjeje shkatërruese.
“Ne jemi përmbajtur. Ne kemi treguar durim kundrejt veprimeve armiqësore te Amerikës, regjimit zionist (Izraelit) dhe Arabisë Saudite kundër Iranit. Mirëpo ne do t’i shkatërrojmë ata nëse kalojnë vijat tona të kuqe”, u ka thënë Salami protestuesve pro-qeveritarë.
Nga ana tjetër televizioni shtetëror ka promovuar protestën dhe ka shfaqur pamje nga turma që brohoriste “Vdekje Amerikës” dhe “Vdekje Izraelit” .
Kujtojmë se qindra mijëra iranianë të klasës punëtore kanë nisur protestat më 15 nëntor, për shkak të rënies së vlerës së valutës dhe rritjes së çmimit të produkteve bazike për jetesë, prej kur Shtetet e Bashkuara janë tërhequr një vit më parë nga marrëveshja bërthamore që Teherani ka nënshkruar me fuqitë botërore më 2015 dhe kanë kthyer të gjitha sanksionet ndaj Iranit.
Si pasojë e dhunës dhjetëra persona janë vrarë nga forcat e sigurisë dhe rreth 100 banka dhe ndërtesa janë djegur./Opinion.al
