Qeveria shqiptare po mundohet të çelë negociata për të arritur një marrëveshje për pensionet edhe me Greqinë, pas marrëveshjes së arritur me shtetin italian.
Në një intervistë për Klan News, zv.Ministrja Olta Manjani tha se marrëveshja është gati dhe janë bërë dy takime teknike ku ka rezultuar që ka një përputhshmëri mes sistemit tonë dhe atij grek.
Sipas zv. ministres marrëveshja është gati por duhet vullneti politik nga ana e Greqisë për të vijuar më tej me procedurat.
“Ka një numër të lartë shqiptarësh në shtetin fqinj që është Greqia. Ne marrëveshjen e kemi gati, grupi negaciatorë është gati. Kemi bërë deri tani dy takime në nivel teknik. Procedura e zakonshme për fillimin e negociatave, për nënshkrime të tilla fillojnë me takime teknike, që grupi negociatore të kuptojnë nëse sistemet e grupit të menaxhimit të sigurimeve shoqërore janë të përputhshme. Rezulton që sistemi ynë edhe me shtetin grek është shumë i përputhshëm dhe presim një vullnet politik nga ana e shtetit grek për të vijuar më tej me negociatat teknike zyrtarisht. Pala shqiptare është shumë gati, marrëveshjen e kemi gati, presim vetëm një sinjal nga ana e palës greke”, tha Manjani.
