Bashkitë kufitare të Shqipërisë, Greqisë dhe Maqedonisë së Veriut, të cilat lagen nga ujërat e liqeneve të Prespës së Madhe dhe Prespës së Vogël, nënshkruan një marrëveshje bashkëpunimi, për ruajtjen e peizazhit dhe ujërat e dy liqeneve nga ndotja.
Sipas marrëveshjes, bashkia e Pustecit dhe Devollit, në pjesën shqiptare dhe bashkitë respektive në vendet fqinje, duhet të ndërmarrin veprime të përbashkëta dhe të koordinuara me njëra-tjetrën për të reduktuar nivelin e ndotjes në liqene, si dhe të angazhohen për të plotësuar detyrimet që vite më parë kanë vendosur bashkë qeveritë përkatëse. Për kreun e bashkisë së Pustecit, Pali Kolefski, aspektet e bashkëpunimit janë disa, por dy janë kryesoret; peshkimi dhe ruajtja e liqenit nga ndotja.
Sipas specialistëve të mjedisit të tre vendeve, ndotjet më të mëdha të këtyre liqeneve janë ato industriale dhe të pesticideve, të evidentuara në Greqi dhe Maqedoni të Veriut. Ndërkohë palës shqiptare i del detyrimi që të zgjidhë problematikën e ujërave të zeza. Bashkia e Pustecit ka në realizim dy projekte kanalizimesh për t’i dhënë fund këtij fenomeni.
Të gjitha bashkitë synojnë që përmes projekteve të përbashkëta në BE të arrijnë një zhvillim të qëndrueshëm në rajonin e Liqeneve të Prespës, që përfshin peizazhin e mbrojtur dhe një trashëgimi të pasur historike dhe kulturore.
Klan News
