Gerta Zaimi, drejtuesja e Tvklan.al ka folur në emisionin “Opinion” në lidhje me marrëveshjen e paqes në Gaza. Zaimi shprehet skeptike në lidhje me funksionimin e kësaj marrëveshje e cila siguroi një armëpushim mes Izraelit dhe Hamasit në Gaza.
Sipas saj, marrëveshja nuk përfshin bazat reale, për një zgjidhje të qëndrueshme të konfliktit izraelito-palestinez. Zaimi tha se nuk ka “shpresa të mëdha” për këtë marrëveshje, duke theksuar se konflikti është i rrënjosur historikisht.
“Të jem realiste, nuk jam me shpresa të mëdha. Jam skeptike nëse do marrë fund konflikti. Konflikti ka rrënjë të thella, ka nisur që më 1948. Nuk ka baza të qëndrueshme marrëveshja. Nuk garantohet shteti palestinez dhe mungon dhe pjesa kundër pushtimit. Kolonët sot janë në 700 mijë”, – theksoi Zaimi.
Ajo tha se nëse Trump nuk do ishte në krye të Shtëpisë së Bardhë, nuk do e kishim as këtë marrëveshje.
“Me Biden dhe Harris nuk do arrihej këtu. Kjo arrihet me Trump, gjë e mir, që arrihet, se i jep fund gjenocidit. Trump nuk i fali Netanyahut sulmin mbi Katarin”, tha ajo.
Zaimi paralajmëroi gjithashtu se jemi ende në fazën e parë të procesit dhe se fazat e tjera nuk janë pranuar nga Izraeli.
“Netanyahu nuk ka pranuar fazat e tjera. Jemi në fazën që merret kohë për të vepruar më pas”, shtoi ajo.
Duke folur për qëndrimin izraelit, Zaimi theksoi se për qeverinë e Netanyahut “shteti palestinez nuk ekziston” dhe se kjo është një nga pengesat kryesore për arritjen e një paqeje të qëndrueshme.
Në përfundim, Zaimi tha se dy janë rrugët drejt paqes së vërtetë: krijimi i dy shteteve, apo një shtet i përbashkët, i cili aktualisht nuk pranohet nga bashkësia ndërkombëtare.
“Nëse do të krijosh paqe, ose krijo dy shtete, ndryshe ke zgjidhjen me një shtet, që nuk pranohet nga bota”, përmbylli Zaimi.
