Kryeministri Edi Rama ka komentuar sërish arritjen e marrëveshjes Kosovë-Serbi. Kreu i qeverisë sqaroi se zgjidhja që iu dha ngërçit të gjatë është një zgjidhje e kornizës së Ballkanit të Hapur në sensin që të treja vendet që bëjnë pjesë në nismë Shqipëria, Maqedonia e Veriut dhe Serbia lëvizin me ID në kuadër të marrëveshjeve të nënshkruara.
Rama theksoi se nuk ka ndikuar për këtë çështje, ndërsa shtoi se nëse Kosova do të ishte ulur në tryezën e Ballkanit të Hapur, ngërçi do të ishte zgjidhur me kohë.
“Edhe ti si të gjithë të tjerët je pjesë e një kohe që e ka kthyer transformimin e atyre që thuhen në tituj që nuk kanë lidhje me atë që thuhet. Unë nuk kam thënë asgjë të ngjashme, jo të njëjtë me atë që ti citove. Unë kam thënë dje që e përsëris dhe sot, zgjidhja që iu dha një ngërçi të gjatë dhe të përsëritur është një zgjidhje e kornizës së Ballkanit të Hapur në sensin që të gjithë këtu qarkullojnë me karta ID. Sot ata që lëvizin nga Shqipëria për RMV, Serbi dhe anasjelltas nuk kanë nevojë për pasaportë. Thashë po ashtu që nëse Kosova do të ishte e ulur në tryezën e Ballkanit të Hapur dhe nuk do të refuzonte, kjo çështje do ishte zgjidhur me kohë. Jam i bindur për këtë. Këtë nuk e zgjidhi as kjo treshe, as Shqipëria apo unë. Janë këto rrugë që po jetësohen dhe janë sfondi edhe i asaj zgjidhje, të cilën dje e kam thënë hapur. Ia kam thënë dhe presidentit veç. Është konfirmuar qasja e presidentit Vuçiç në raport me lëvizjen e njerëzve.
Jam i bindur të përsëris, dje kemi asistuar në një prezantim të bërë nga përfaqësuesit e prodhuesve të verërave apo shefat e kuzhinës dhe kemi dëgjuar për domatet që vijnë nga Shqipëria këtu e janë gjithmonë e më të kërkuara e preferuara nga restorantet. Ato domate vijnë pa pengesë. Për të shkuar në Bosnje bëhen salcë në kufi. Rruga për në Bosnje është agro-përpunim. Këta porosisin domate të freskët, marrin salcë. Kush porosit qumësht me Ballkanin e Mbyllur merr kos ose dhallë”, tha Rama.
