Mark Nika, xhaxhai i Aleks Nikës, ka dhënë një deklaratë për mediat pas përfundimit të dëshmisë së tij në SPAK.
Ai tha se këtë të hënë u trajtua ana teorike, ndërsa ritheksoi se për këtë çështje duhet të hetohet zinxhiri komandues.
Ai foli me gazetarët pasi u mor në pyetje nga SPAK dhe tha se drejtësi do të ketë vetëm kur të dënohen të gjithë ata që dhanë urdhër për të qëlluar mbi turmën më 21 janar 2011, duke nisur nga kryeministri i kohës, Sali Berisha.
“Hetimi do të shkojë edhe tek pjesa se kush i ka fshirë provat. Hetimi buron nga Strasburgu, po të mos ishte Strasburgu çështja nuk do të kërkohej kurrë. Nëse nuk dënohet zinxhiri komandues dosja nuk mund të jetë e zbardhur, përgjegjësia duhet kërkuar tek kryeministri i kohës. Kanë bërë fshehje provash, kanë deformuar plumbin. E thashë edhe në SPAK, kush ka qëlluar në njerëz duhet të përgjigjet për vrasje në bashkëpunim”, ka thënë mes të tjerash ai.
