Zyrtarizohen ankimimet e para për rezultatin e zgjedhjeve në Maqedoni. LSDM dhe Lëvizja Shqiptare Besa pretendojnë se ka pasur parregullsi në procesin e numërimit të votave në Njësinë 6, të banuar me shumicë shqiptare. Lideri i LSDM-së, Zoran Zaev, tha se nëse korrigjohen numrat, rezultati shkon në 50 me 50 deputetë. Zaev u bëri thirrje partive politike shqiptare të mos bëjnë koalicion me Nikolla Gruevskin.
“Regjimi nuk guxon të formojë qeverinë e Maqedonisë. Të gjitha partitë nuk duhet të mendojnë për të shkelur vullnetin e shprehur në zgjedhje për formimin e qeverisë në koalicion me Nikolla Gruevskin”.
Formimi i qeverisë së re është në duart e partive shqiptare, të cilat kanë fituar 20 mandate. BDI e Ali Ahmetit ka deklaruar se do të presë rezultatin përfundimtar për të shprehur qëndrimin, Lëvizja Besa ka theksuar se do të mbështeste një qeveri të gjerë ose reformatore, por edhe kjo pjesëmarrjen do ta kushtëzojë me kërkesat për çështjet shqiptare, sikurse edhe Aleanca për Shqiptarët.
Situata ka prodhuar analiza të ndryshme politike, nga të cilat dominon ideja se vitin e ardhshëm, në të njëjtën kohë me zgjedhjet lokale, Maqedonia mund të mbajë edhe zgjedhje të tjera të përgjithshme.
“The Economist” parashikon si pjesë të skenareve të ardhshme se situata e paqartë mund të vazhdojë për një kohë të gjatë, deri në vendosjen e një Kryeministri konsensual. Një koalicion i gjerë i partive kryesore është një tjetër alternativë për formimin e qeverisë aq të nevojshme në Maqedoninë fqinje. Dhe skenari i tretë është i një koalicioni të opozitës social demokrate, me partitë e kampit shqiptar.
Tv Klan
