Përgjegjësinë për inkriminimin e politikës nuk e kanë gjykatësit dhe prokurorët, pasi për 27 vite asnjë politikan shqiptar nuk ka dalë në bankën e të akuzuarve para drejtësisë për afera korruptive apo lidhje me krimin e organizuar.
Ish-ministri i Drejtësisë, Ylli Manjani, përmes një shënimi në Facebook, i bën apel politikës dhe të gjithë institucioneve shtetërore që të heqin dorë nga teatri dhe të marrin përgjegjësitë që u takojnë.
Manjani shkruan se pavarësisht se sistemi i drejtësisë në vend është i korruptuar, sërish përgjegjësinë për inkriminimin e politikanëve nuk e mbanjnë gjykatësit dhe prokurorët.
Ai thekson se deri më sot, asnjë politikan shqiptar, nuk është çuar para drejtësisë dhe më pas të jetë kjo e fundit që i liron ata.
Ja postimi i Manjanit:
Jo më teatër, por merrni përgjegjësitë!
—?—?—?—?-
Që të merremi vesh:
Pa dyshim që gjyqtarët e Prokurorët e korruptuar, kanë pëgjegjësinë e vet për mos dënimin trafikantëve!
Por ata (gjykatësit e Prokurorët) nuk janë as drejtuesit, as organizuesit e as mbeshtetësit e trafikantëve! Përgjegjësinë për këtë gjë duhet tja kërkojmë QEVERISË!
Në cilin rast, kur kishte një trafikant me dosje të plotë me prova, gjykatat dhanë pafajsi?! Po flas për prova jo llafe e as letra pa vlerë.
Cilin “peshk të madh” zuri policia dhe e vuri e liroi Drejtësia?! Po na i zënë policitë e vendeve të tjera, se kjo e jona i ndihmon të fshihen.
Insistoj në bindjen time më të thellë se: korrupsionin dhe krimin e bën ose e nxit qeveria! Gjykata thjesht merr bakshishin.
Drejtësia duhet të ndëshkohet për shkak se ka lejuar politikën të fusë hundët në punët e saj! Por nuk mund të ndëshkohet për shkak se “hunda” e politikës nuk jeton dot pa mall e krim!
Nëse duam të ndreqim ndonjë gjë në këtë vend, mirë është të fokusohemi tek problemi. Dhe në shoqërinë demokratike “Problemi është qeveria”- ka thënë Presidenti i USA Ronald Regan.
Zhvendosja e vemendjes nga problemi tek nënproblemi vetëm sa e përkeqson gjendjen!
Megjithatë, drejtësinë e reformuam, po qeverisë si do i bëjmë!
