TIRANE- Ministri i Drejtësisë, Ylli Manjani, ka deklaruar se me finalizimin e Reformës në Drejtësi, nuk do të ketë më gjyqtarë, prokurorë, apo zyrtarë të paprekshëm. Sipas tij, pasuritë e pajustifikuara të gjithsecilit do të hetohen dhe në rast se dalin të tilla, atëherë do të marrin ndëshkimin e merituar. Sipas Manjanit, kjo është një nga komponentët e rëndësishëm të reformës, nderkohe qe tema antikorrupsion është temë simpatike për opinionin publik.
Çështja është që nuk duhet të harxhojmë kohë si do të na dëgjojë opinioni publik. Ne duhet të synojmë që të ndërtojmë një sistem gjyqësor të besueshëm, por kjo nuk bëhet nga jashtë sistemit. Është shumë e rëndësishme që sistemi i besueshëm të nisë nga vetë gjykata. Një gjykatë e besueshme duhet të bëjë dy gjëra, e para të ngrihet mbi pushteti politik dhe të gjykojë ministra, deputetët, kryeministra, pa iu dridhur qerpiku. E dyta, duhet të gjykojë shpejt për njerëzit. Njerëzit që presin te dera e gjykatës janë kontingjent për të shtuar klimën e mosbesimit” thotë ai.
Sipas Manjanit, nëse gjykata nuk besohet, nuk kemi bërë asgjë. “Do të kemi bërë reformën e radhës, ligjet e radhës. Ju e shikoni sa shpesh ndryshohet Kushtetuta. Kjo është mungesë stabiliteti juridik. Në Shqipëri, parimi i konstitucionalizmit është goditur rëndë, thjesht dhe për faktin që në Kushtetutë hyhet kaq shpesh dhe për gjithçka. Nëse bëjmë një gjykatë të besueshme, kemi zgjidhur gjithçka, kemi zgjidhur dhe qeverisjen e mirë”thotë Manjani. /panorama/
