Ish-ministri i Drejtësisë, Ylli Manjani ka komentuar reagimin e ambasadës amerikane në Tiranë; se ndjehet e zhgënjyer për deklaratën e kryeministrit Edi Rama në Parlamentin e Kosovës, për një President Kombëtar.
Përmes një shënimi në Twitter, Manjani shprehet se ambasada amerikane në Tiranë nuk u ndje e zhgënjyer kur Rama votoi kundër Amerikës në OKB, por ndjehet e tillë për një deklaratë që nuk gënjeu askënd.
Ai thekson se ka shumë zhgënjime të pathëna, për të cilat amerikanët kanë plot arsye që të ndiheshin të tillë.
“Heu, qenka zhgënyer Ambasada e USA me Ramën?! Për një deklaratë të tij që nuk gënjeu askënd. Po Ai votoi kundër Amerikës dhe nuk u zhgënjye Ambasada! Po për drogat e forta, investimet amerikane, futjen e bisnesit Rus e lidhjen e ngushtë me Turqinë?! Ka plot zhgënjime të pa thëna”,-shkruan ai.
Heu, qenka zhgënyer Ambasada e USA me Ramën?! Për një deklaratë të tij që nuk gënjeu askënd. Po Ai votoi kundër Amerikës dhe nuk u zhgënjye Ambasada! Po për drogat e forta,investimet amerikane, futjen e bisnesit Rus e lidhjen e ngushtë me Turqinë?! Ka plot zhgënjime të pa thëna..
— Ylli Manjani (@yllimanjani) February 21, 2018
Ambasada amerikane në Tiranë ka reaguar të mërkurën pasdite në lidhje me deklaratën e kryeministrit Rama në Parlamentin e Kosovës për një President Kombëtar.
Ambasada amerikane shprehet në Twitter se: “mbeti e zhgënjyer nga deklarata e Kryeministrit Rama mbi Shqipërinë dhe Kosovën me rastin e 10 vjetorit të Pavarësisë së Kosovës”.
“Gjuha e shkujdesur që aludon për bashkim është e padobishme dhe dëmton marrëdhëniet e Shqipërisë me vendet fqinje. Ne i bëjmë thirrje udhëheqësve që të jenë fqinjë të mirë dhe të lënë mënjanë gjuhën ndarëse të së shkuarës”, thuhet në reagimin e ambasadës amerikane.
Edhe Bashkimi Europian dënoi qëndrimin e kryeministrit Rama. Në një reagim të dy ditëve me parë u theksua se deklarata të tilla nuk ndihmojnë në ndërtimin e raporteve të mira mes vendeve ballkanike si dhe mund të interpretohet si ndërhyrje politike në vendet fqinje.
Gjatë seancës solemne të Kuvendit të Kosovës më 18 Shkurt për 10-vjetorin e Pavarësisë, kryeministri Edi Rama hodhi idenë e një Presidenti të përbashkët të unitetit kombëtar mes Shqipëisë dhe Kosovës.
Rama deklaroi se Kosova dhe Shqipëria do të kenë një politikë të jashtme e jo veç ambasada dhe përfaqësi diplomatike të njëjta, por pse jo, një president, simbol të unitetit kombëtar dhe një politikë kombëtare të sigurisë.
Rama: Mbase, ky parafytyrim sot mund të mos jetë i këshillueshëm në rrafshin e racionales, por historia, për të cilën mora leje qysh në fillim për të mos folur sot, na këshillon se çka është e drejtë të ëndërrohet, nuk është e pamundur të realizohet. E ardhmja u takon atyre që i paraprijnë asaj dhe e shkuara e 20 viteve të fundit të këtij vendi, Kosovës, i ka paraprirë falë njerëzve po të këtij vendi, një të ardhmeje që në çdo rast është më e afërt, sesa largësia që shohim sot.
