Në një deklaratë për mediat në përfundim të seancës plenare të ditës së sotme, ministri i Drejtësisë, Ulsi Manja, u shpreh se nuk kërkon bashkim votash nga Basha dhe nga askush tjetër por nga Kuvendi pasi sipas tij amnistia është një akt mëshire.
Më tej ai foli i bindur se amnistia do të marrë 90 vota pasi sipas Manjës ka deputetë të përgjegjshëm në sallë.
“Nuk kërkojmë bashkim votash as nga Basha as nga askush, por votat nga Kuvendi, e majta dhe e djathta, sepse amnistia është akt mëshire. E kemi për detyrë të japim votat për këtë akt mëshire. Ka mbi 4 vjet që ky parlament, duke iu shmangur traditës, nuk ka bërë amnisti.
Nuk i dua votat e Bashës me kusht, duam votat e Kuvendit të Shqipërisë. Të jeni të bindur se do të ketë mbi 90 vota, sepse ka deputetë të përgjegjshëm në atë sallë. Basha ka kërkuar amnisti vetëm protestuesit 2018-2020, vetëm për ata të vetët”, tha Manja.
