Ministri i Drejtësisë, Ulsi Manja në mbledhjen online të komisionit për Çështjet Ligjore tha se burgjet janë të mbipopulluara dhe se kanë mbi 190 të paraburgosur më shumë sesa kanë kapacitete.
Sipas tij, duhet që të t’i përafrohemi standardeve të BE-së sa i takon numrit të paraburgosurve dhe të dënuarve në burgje.
“Jemi plus 190 të paraburgosur dhe të dënuar më shumë sesa kemi kapacitete. Nëse kemi 5818 të paraburgosur dhe të dënuar kapacitetet tona janë plus 190 më shumë. Referuar standardeve të BE, nuk do duhet të kishim këtë numër personash të paraburgosur. 2204 kemi të dënuar dhe po t’u referohemi standardeve të BE do duhet të kishim 30% si maksimum të numrit të paraburgosurve në raport me të dënuarit. Jemi tek 2500 persona të paraburgosur më shumë sesa standardet e BE. Jemi mbi kapacitetet. Amnistia në këtë moment përveç parimeve të tjera, do na shërbejë edhe ne për të na krijuar një mundësi të sistemit siç duhet”- u shpreh Manja.
Sipas Manjës, duhet të ketë forma të tjera të masave të sigurisë apo dënimeve. Ai tha se po shikohet mundësia e vënies në punë të mbikëqyrjes elektronike për të dënuarit.
“Masat e sigurimit, jo për çdo gjë duhet të shkohet drejt burgut. Masat alternative të dënimit, janë pushtet që e ka drejtësia. Por e thotë kodi që për veprat që dënohen deri në 5 vite, shërbimi i provës mund të jetë një zgjidhje, pra duhen parë dënimet alternative”- shpjegoi ministri.
