Presidenti Meta paralajmëroi sot në konferencën për mediat se ditën e hënë kur ai pritet të mbajë manifestimin në Bulevardin Dëshmorët e Kombit, mund të dalin lajme për persona të infektuar me koronavirus.
I pyetur në lidhje me arrestimin e gazetarit të njohur Henri Çili ditën e djeshme, Meta tha se cdo njeri duhet të përballet me ligjin por se nga situata e krijuar në vend ai nuk do të çuditej nëse edhe kolegë gazetarë të tij të cilët do të arrestoheshin si drejtues grupesh kriminale.
“Cilido që ka probleme me ligjin duhet të përballet me organet e drejtësisë pavarësisht situatës ku jemi. Por unë nuk do të habitesha për shkak të alertit të grupit puçist sikur ju nesër të dëgjonit përshembull se Fatos Lubonja dhe Artur Zhej janë arrestuar si drejtues të Camorras dhe Ndragetas”, tha Meta.
Më tej Presidenti shtoi se nuk do të habitej sikur të hënë të dali lajmi se ka persona pranë presidencës të sëmurë me koronavirus.
“Nuk do habitesha sikur të hënën në mëngjes të dilte lajmi se dy persona pranë presidencës janë të sëmurë me koronavirus. Alerti është në vend tjetër për të krijuar ngjarje dhe fokus të cilat duna të shmangin një çështje shumë më të madhe me të cilën është bashkuar tashmë çdo qytetar i ndershëm në këtë vend”, deklaroi ai. /Opinion.al
