Në Partinë Socialiste duket se nuk shqetësohen aspak nga deklarata e Lulzim Bashës për të kërkuar djegien e mandateve të deputetëve opozitarë.
Në mbledhjen e grupit parlamentar të PS-së, siç mëson Opinion.al, vetë kryeministri Rama iu ka kërkuar deputetëve që të vazhdojnë punën për zgjedhjet. Bëhet fjalë për zgjedhjet lokale, pasi sipas tij nuk ka vend për zgjedhje të parakohshme.
Edhe vetë deputetët socialistë kanë qenë në një linjë me kryeministrin, duke thënë se pavarësisht vendimit të opozitës, Kuvendi do të jetë funksional.
Në nenin 71 të Kushtetutës përcaktohet se mandati i deputetit mund të mbarojë edhe kur hiqet dorë prej tij, pa pritur mungesën për 6 muaj me radhë. Menjëherë pas këtij veprimi, deputeti, sipas Kodit Zgjedhor, duhet të deklarojë në mëyrë publike vendimin para Komisonit për Rregulloren dhe Mandatet.
Kuvendi, jo më vonë se 30 ditë, njofton KQZ-në për krijimin e vakancës, për t’i kaluar mandatin e ndërprerë kandidatit vijues të listës së të njëjtës parti politike. Nëse lista e kandidatëve partiakë shterohet, atëherë mandati i ndërprerë i kalon partisë së koalicionit me herësin më të lartë.
