Temperaturat e ulëta të ditëve të fundit kanë sjellë shtimin e rasteve të sëmundjeve nga virozat e stinës ku më të prekurit kanë qenë fëmijët.
Gjatë një inspektimi në qendrën shëndetësore nr. 10 në Tiranë, ministrja e shëndetësisë Ogerta Manastirliu u shpreh se shërbimi në tre qendra shëndetësore në Tiranë do të jetë 24 orë.
Në këtë mënyrë sipas saj nuk do të paraqitet nevoja për t’u drejtuar në spital për urgjencat pediatrike të cilat mund të trajtohen në qendrat shëndetësore.
Gjatë fjalës së saj në qendrën shëndetësore nr.10 në Tiranë, e cila do të jetë një nga qëndrat që ofron shërbimin 24 orë ministrja tregoi se ku do të jenë qendrat e tjera të caktuara për të ofruar këto shërbime për fëmijët edhe gjatë natës.
“Virusi i gripit, sipas sistemit të survejancës ka një intensitet mesatar, me tendencë rritje, ndaj ne i jemi përgjigjur kësaj situate me garantimin e shërbimit shëndetësor 24 orësh në 7 ditë të javës në qendrat shëndetësore të Tiranës, ku edhe fluksi është më i lartë.
Janë 3 qendra shëndetësore, ajo nr. 10 që do të mbulojë zonën e ish-Oxhakut, qendra shëndetësore nr. 8 në zonën e ish-bllokut, qendra nr. 7 në Laprakë, të cilat ofrojnë shërbim shëndetësor për fëmijët në moshën pediatrike edhe gjatë natës.
Të gjitha shërbimet përkatëse që sot merren në QSUT apo deri dje janë marrë në QSUT do të vijojnë të merren në këto qendra shëndetësore. Mjekët janë të kualifikuar, kemi marrë masa për furnizimin me barna dhe material mjekësore,”-u shpreh Manastirliu.
Aktualisht në Shqipëri si dhe në vendet e tjera evropiane është duke qarkulluar virusi i tipit A, nëntipi A/H1 me intensitet mesatar, por me tendencë në rritje lidhur me temperaturat e ulëta dhe stinën e dimrit./Opinion.al/
