Policia e Gjirokastrës ka ndaluar mbrëmjen e sotme dy autobusë të linjës Shqipëri-Greqi.
Përmes një njoftimi zyrtar, blutë bëjnë me dije se gjatë kontrollit në këto dy autobusa janë konstatuar mallra të dyshuara kontrabandë.
Në prangat e policisë kanë rënë tre shoferët e autobusëve, të cilët akuzohen për veprat penale “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës” dhe “Kontrabanda me mallra të tjera”.
Në cilësinë e provës materiale u sekuestruan 35 kuti me medikamente të ndryshme, disa steka me paketa me cigare, disa kuti me “Nescafe”, qumësht pluhur , vaj ulliri dhe mallra të tjera, të cilat nuk i kishin deklaruar konform ligjit në Pikën Doganore të Kakavijës.
Njoftimi i policisë:
Në lidhje me një lajm të publikuar në media, për shoqërimin e dy autobusëve me pasagjerë në ambientet e Policisë Gjirokastër, ju informojmë se:
Seksioni për Hetimin e Krimeve Ekonomike dhe Financiare pranë Drejtorisë Vendore të Policisë Gjirokastër ditën e sotme, në aksin rrugor Kakavijë -Gjirokastër, në pikën e kontrollit të ngritur në vendin e quajtur “Dervician”, bazuar dhe në informacionet e siguruara në rrugë ligjore, kanë ndaluar 2 autobusë të linjës Tiranë-Kretë dhe Athinë-Gjirokastër. Gjatë kontrollit kanë konstatuar mallra të dyshuara kontrabandë, dhe për këtë fakt u shoqëruan në ambientet e Policisë për verifikim.
Gjatë kontrolleve të ushtruara në dy autobusët Policia gjeti dhe sekuestroi në cilësinë e provës materiale 35 kuti me medikamente të ndryshme, disa steka me paketa me cigare, disa kuti me “Nescafe”, qumësht pluhur , vaj ulliri dhe mallra të tjera, të cilat nuk i kishin deklaruar konform ligjit në Pikën Doganore të Kakavijes.
Në vijim të veprimeve procedurale u referuan materialet në Prokurori ku nisi procedimi penal për 3 shtetas (shoferët e autobusëve), për veprat penale “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës” dhe “Kontrabanda me mallra të tjera”, parashikuar nga nenet 172 dhe 174 i Kodit Penal.
Në lidhje me pasagjerët që kanë qenë duke udhëtuar me këta autobusë, Policia ka njoftuar shoqëritë përkatëse të cilat dërguan autobusë të tjerë duke mundësuar transportimin e pasagjerëve drejt destinacioneve të tyre.
Drejtoria Vendore e Policisë Gjirokastër falënderon dhe fton mediat e qytetarët që të denoncojnë rastet e paligjshmërive në çdo formë të shfaqjes së tyre, në numrin 112, duke iu garantuar reagim të menjëhershëm.
