Një 68-vjeçar është vënë në prangat e policisë në Malësi të Madhe, pasi akuzohet për kultivim të kanabisit.
Në fshatin Shegan u evidentuan 62 fidanë kanabisi, për të cilat policia identifikoi dhe arrestoi si autor 68-vjeçarin Gj.K. banues në të njëjtin fshat.
Kanabisi i zbuluar u asgjësua, ndërsa 68-vjeçari dyshohet se është autor i kultivimit të 103 fidanëve kanabis me datë 24.08.2024 në territorin e fshatit Gashaj.
Njoftimi i plotë:
Vijon me intensitet megaoperacioni “Territor i pastër”, kundër kultivimit të bimëve narkotike.
Tentoi të kultivonte 62 fidanë kanabis në fshatin Shegan, në pronë publike, kapet në flagrancë dhe vihet në pranga 68-vjeçari, Gjek Kacaj.
Ky shtetas dyshohet se është dhe autor i kultivimit të 103 fidanëve kanabis të asgjësuara me datë 24.08.2024 në territorin e fshatit Gashaj.
Në vijim të megaoperacionit kombëtar të koduar “Territor i pastër”, shërbimet e Komisariatit të Policisë Malësi e Madhe, gjatë kontrollit të territorit në bashkëpunim me SPK Bajzë, duke përdorur dronë për monitorim ajror, në njësinë Administrative Kastrat, në fshatin Shegan, kanë konstatuar të mbjella në tokë 62 fidanë të dyshuar kanabis.
Shërbimet e Policisë kanë organizuar punën për identifikimin e autorit.
Bazuar dhe në inteligjencën policore shërbimet e Policisë bënë të mundur kapjen dhe arrestimin në flagrancë të shtetasit Gj. K., 68 vjeç, banues në fshatin Shegan, i dyshuar si autor i kultivimit të 62 fidanëve kanabis, të cilat u asgjësuan nëpërmjet djegies.
Gjithashtu bazuar në hetime dhe inteligjencën policore dyshohet se 68-vjeçari është dhe autor i kultivimit të 103 fidanëve kanabis të asgjësuara nga Policia me datë 24.08.2024 në territorin e fshatit Gashaj, Njësia Administrative Kastrat.
Vijon puna për identifikimin dhe kapjen e shtetasve të tjerë të implikuar në këtë veprimtari kriminale.
