Kuvendi vendosi sot shkarkimin e Arben Malajt nga Bordi Drejtues i Bankës së Shqipërisë. 72 deputetë votuan pro shkarkimit të ish-ministrit të Financave, çka tregon se socialistët kanë qenë të ndarë në lidhje me këtë vendim.
Zoti Malaj ishte këtë të mërkurë në emisionin Opinion. Ai u pyet drejtpërdrejt se përse u shkarkua, dhe si përgjigje ishte: Duhet pyetur shoku Rama. Ai hodhi akuza të forta duke e cilësuar PS-në, si Parti Komuniste.
“Unë di sepse është shoku, sepse në Partinë Komuniste vazhdon të flitet me shoku . PS besoj sot është më shumë komuniste se ajo e 92”, tha zoti Malaj.
Sa i përket procedurës ai tha se ishte krejt e gabuar, pasi sipas tij në këtë rast duhet të vendoste Bordi i Bankës.
“Nëse do kishte ndonjë shqetësim të vogël i lihej bordit të Bankës, bordi ka përfaqësi nga tre institucione. Bordi nuk ka marrë asnjë veprim. Qeveria vihet në lëvizje, vetëm kur ndodhin skandale seksuale. Siç ndodhi me Strauss-Kahn”, tha ai.
Po ashtu ish ministri i Financave tha se kishte marrë një mesazh kërcënues nga Taulant Balla, që i kërkonte të mos kritikonte kryetarin e Bashkisë së Tiranës dhe qeverinë./ Opinion.al
