Një aksident automobilistik ka ndodhur pasditen e sotme në aksin rrugor Elbasan –Cërrik, ku si pasojë ka humbur jetën drejtuesi i motoçikletës dhe pasagjeri.
Policia njofton se një automjet tip “Audi”, i drejtuar nga shtetasi A.Sh., 25 vjeç, banues në fshatin Jagodin të Elbasanit, është përplasur me një motoçikletë me drejtues shtetasin E. D., 35 vjeç, banues në fshatin Shirgjan. Ky i fundit nuk ka mundur t’i mbijetojë përplasjes dhe ka ndërruar jetë. Shtetasi F.Q., 56 vjeç, i cili ishte pasagjer në motoçikletë, u dërgua me shenja jetë në spital, por në gjendje shumë të rëndë. Fatkeqësisht, ai nuk arriti që t’i mbijetonte plagëve të marra, duke ndërruar jetë pak orë më vonë.
Drejtuesi i mjetit është shoqëruar në Komisariatin e Policisë Elbasan, ndërsa grupi hetimor ndodhet në vendngjarje dhe po punon për zbardhjen e shkakut të aksidentit. /Opinion.al
