U prezantojmë Oscar-in, macen për të cilën besohet se ka parashikuar vdekjen e 100 personave në një shtëpi pleqsh.
Macja laramane dhjetëvjeçare i kalon ditët e saj duke shëtitur nëpër korridoret e kësaj shtëpie për përkujdesjen ndaj pleqve dhe nga infermieret konsiderohet si një mace tejet jo sociale.
Por, njerëzit e vetëm me të cilët shoqërohet kjo mace, janë ata njerëz që janë duke jetuar ditët e fundit të tyre. Stafi i infermiereve dhe doktorëve në ishullin Rhode janë të mahnitur nga aftësia natyrore e Oscar-it për t’i gjetur pleqtë që janë afër vdekjes, në mënyrë që, më pas, t’ua ofrojë atyre një mbështetje dhe shoqëri aq të nevojshme.
Më i mençur Oscar-i se sa mjekët?
Për më tepër, kjo mace simpatike në disa raste ka demantuar edhe prognozat e mjekëve, në lidhje me atë se cilët pacientë gjenden buzë vdekjes. Talenti i kësaj maceje së pari ishte zbuluar në një artikull të botuar në gazetën “New England Journal of Medicine” në vitin 2007 dhe, që nga ajo kohë, besohet se ajo ka paraparë vdekjen e rreth 100 personave. Autori i atij shkrimi, Dr. David Dosa, ka deklaruar se macja shoqërohet vetëm me të sëmurët të cilëve iu kanë mbetur vetëm pak ditë jetese.
Familjarët, të kënaqur
Dr. Dosa tregon se shumë familjarë të pleqve kanë deklaruar se ekzistimi i maçokut aty është lehtësim për ta. Por, në nëntor të vitit 2013 ishte vetë maçoku Oscar ai që u sëmur. Për më tepër, për shkak të një reagimi serioz alergjik, ai ishte dërguar në kujdesin intensiv të veterinarisë, ku zemra i ishte ndalur për disa sekonda. Falë përpjekjeve të veterinarëve, ai u kthye sërish në jetë. Për disa muaj ai ishte pacient. Por, tani, Oscar i është kthyer me elan detyrës së tij, të identifikimit dhe mbështetjes së personave në ditët e fundit të tyre. Dr. Dosa e quan atë mrekulli të vërtetë.//Express
