Vetëm pak ditë nga nisja zyrtare e fushatës elektorale, është bërë arrestimi i parë për korrupsion aktiv në zgjedhje.
Mësohet se një person është arrestuar në Lushnje pasi dyshohet se i premtoi një shtetasi dhënien e një shume parash për t’i blerë votën në interes të një subjekti politik.
Muharrem Toska, i cili ka bërë kallëzim në polici me pretendimin Marin Leka i ka marrë kartën e identitetit dhe i ka premtuar 50 mijë lekë në këmbim të votës së tij dhe familjes, në dëshminë e tij para policisë ka deklaruar se Leka do i jepte paratë në këmbim të votave për Partinë Demokratike.
Megjithatë pasi i ka dhënë kartën, është penduar, dhe ka zgjedhur ta denoncojë rastin. Nga ana tjetër, gjatë kontrolleve, Marin Lekës i është gjetur ID me emrin e Muharrem Toskës në shtëpi, për të cilën në dëshmi ai ka pranuar se e ka marrë si premtim për të votuar, por nuk ka pranuar të tregojë për cilin subjekt është bërë premtimi.
Rasti është referuar në SPAK nga policia, e cila e ka mbyllur vetëm procedurën paraprake.
