Një 18 vjeçar humbi jetën fatalisht mbrëmjen e së shtunës. Makina me të cilën udhëtonte ra në një gropë, në kantierin që është hapur për ndërtimin e Lungomares në Vlorë. Shoferi i shpëtoi këtij aksidenti. Petraq Beja, 21 vjeç nga spitali ka shpjeguar për prokurorinë se punimet pa tabela paralajmëruese ishin shkaku i aksidentit. “Nuk kishte ndriçim, ishte e vështirë të kuptoje se në mes të rrugës ishte e hapur një gropë e madhe”, ka thënë drejtuesi i automjetit, tashmë nën arrest për shkelje të rregullave të qarkullimit rrugor.
21-vjeçari ka rrëfyer se ka tentuar të devijojë në krahun e djathtë pasi në krahun tjetër ishte një mjet, por ka humbur kontrollin e mjetit duke përfunduar në një kanal.
Megjithë dëshminë e shoferit, grupi i hetimit po verifikon nëse firma po i kryen punimet e Lungomares pa siguruar perimetrin me sinjalistikën e duhur.
Në njoftimin zyrtar të policisë së Vlorës thuhet se nga verifikimet e deritanishme firma fituese e tenderit për rregullimin e rrugës është grekja “Intercak”, ajo që po kryen punimet është firma shqiptare “Xhem”.
Për këtë arsye janë thirrur për t’u marrë në pyetje përfaqësuesit e firmës së nënkontraktuar. Ndërkohë që priten edhe konkluzinet e ekspertëve autoteknikë për shpejtësinë me të cilën po drejtonte mjetin Beja. Kalimtarët shprehen të rezervuar për kushtet e sigurisë në rrugë.
“Kushtet e punës deri diku nuk janë të mira. Ato janë shumë të rëndësishme. Sigurimi teknik duhet. Këto duhet t’i bëjnë ata që janë përgjegjës. Ose t’i bllokojnë ose t’i rregullojnë”, shprehen qytetarët.
Rrugës për në Dhërmi, ku përcollën 17-vjeçarin, të afërm dhe familjarë të të ndjerit Kristo Panajoti ndaluan dhe hodhën lule e më pas edhe gurë ndaj mjeteve të firmës, në vendin e aksidentit.
