Kryetari i Partisë Demokratike prej ditësh së djeshme ndodhet në Shtetet e Bashkuara, ku do të marrë pjesë në ceremoninë e inaugurimit të presidentit të 45-të, Donald Trump.
Nëpërmjet një postimi në llogarinë e tij në Facebook, Basha ka zbuluar se mbrëmjen e djeshme ka qenë i ftuar në pritjen e organizuar nga Senatori Ted Cruz, për të cilin ka thënë se është mishërimi i “ëndrrës amerikane”.
“Dje kisha nderin të isha i ftuar në pritjen e organizuar nga Senatori Ted Cruz me të cilin pata një nga bisedat më mbresëlënëse. Jurist i shkëlqyer, prokuror dhe avokat i suksesshëm i Shtetit të Teksasit dhe njohës i rrallë i politikave publike, ai më ofroi këshilla interesante për të luftuar korrupsionin dhe forcuar drejtësinë.
Ted Cruz është vetë mishërimi i ëndrrës amerikane: me baba kubanezo-spanjoll dhe nënë irlandeze, i lindur në Kanada dhe i rritur në Teksas, sot është figura kyçe e Senatit dhe një ndër politikanët më të rëndësishëm të Amerikës. Kjo karrierë është e mundur vetëm në një vend të lirë dhe të hapur për të gjithë.”- shkruan Basha.
