Lulzim Basha “pajton” Majlinda Bregun dhe Arbiola Halimin

Lulzim Basha është përpjekur të ulë gjakrat mes deputeteve demokrate. Në takimin e mëngjesit të sotëm me diplomaten e lartë të BE, Mogherini, kryetari demokrat kishte ulur në një tryeze deputetet Arbiola Halimi dhe Majlinda Bregu.
Kjo e fundit, si kryetare e Komisionit të Integrimit është prezent në shumë takime të tilla me ndërkombëtare. Ndryshe nga sa ka ndodhur me deputeten tjetër Halimi, e cila për herë të parë merr pjesë në një format të tillë.
Ndoshta kjo ka qenë dhe një mënyrë e zgjedhur nga Basha për të “dekoruar” deputeten e qarkut të Elbasanit, e cila ishte mjaft aktive një javë më parë në seancën ku u hodhën objekte dhe vezë kundër Kryeministrit.
Arbjola Halimi ishte dhe nga organizatoret e protestës poshtë zyrave të Edi Ramës dhe në të njëjtën ditë postoi dhe një poezi në profilin e saj në FB, me të cilën “thumbonte” kolegen Bregu që jo vetëm nuk mori pjesë, por dhe u shpreh kundër kësaj proteste.
Në këto kushte, duket se Lulzim Basha ka vendosur që në një takim kaq të rëndësishme të ulë pranë e pranë dy deputetet e tij, për të cilat nuk dihet ende me siguri nëse kanë komunikuar apo ajo para apo pas takimit.
E sigurt është që kryetarit të PD e ka mbështetur qëndrimin dhe rolin që kanë patur deputetet Arbiola Halimi dhe Albina Deda, të cilat edhe pse jo shumë aktive në seancat plenare, janë treguar të guximshme në përballjen direkte me ministrat dhe Kryeministrin. Gjë që vështirë të thuhet për gruan tjetër deputete të PD, Vokshin, që një ditë më pare u pa duke biseduar çlirët me Edi Ramën.